Tâkã hã za ĩt kuĩkre tô krĩkmãsimãzus mnõze, Dat Krdawaihkâ Mnõ Pibumã Hã Danmĩ Rowahdu, Serviço Social nã dat krwamntrẽ mnõ, Ĩt kmã wazrêzem nã. Ponkwnẽ wat krĩkmãsinãzus: Wa ĩnĩn romkmãdâ, akwẽ-Xerente hawi are dure Dat Krdawaihkâ Mnõ Pibumã Hã Danmĩ Rowahdu, Serviço Social nã dat krwamntrẽ mnõ, Universidade Federal do Tocantins (UFT) wam hã nĩm ronkmãdâ. Tahã ĩt kmã wazrêze tô 2013 hawi tô hdukõ 2019 ku.Tâkã hã, ĩt krkazanãmr mnõ re, wat ĩsi snã krĩzdakâ, tô ĩpkẽzako snã, tâkã hã danĩm rom kmãdkâ nã: Dat Krdawaihkâ Mnõ Pibumã Hã Danmĩ Rowahtu Mnõze ĩt krkazanãmr mnõ re, wat aipâ ĩnĩm akwẽ romkmãdkâ nã krĩsimãzus: Tâkã hã romkmãdâ tô wa ĩtê, dure, are wahã dure tô akwẽ are dure wa ĩhawi mãt akwẽ nĩm romkmadâ dure krẽwatobr.Are tâkã hã wat ĩsimã waihuk: Dat Krdawaihkâ Mnõ Pibumã Hã Danmĩ Rowahtu Mnõ za aimõ danĩm romkmãdâ, akwẽ nĩm romkmãdkâ kupanã, tkrê dam rowahut, sĩm romkmãdkâ prabâ, ĩkwaĩ mba wamnẽ.Tâkãnẽ krĩsimãzus mnõ nmẽ, tô akwẽ nĩm romkmãdâ, Dat Krdawaihkâ Mnõ Pibumã Hã Danmĩ Rowahdu, Serviço Social nã dat krwamntrẽ mnõ, kmã simazus mnõ zô, wat kmã stombo, sikmãkwaimram psê nõ zô. Are danĩm romkmãdâ pê tkrĩm waihkâ psê mnõ tô danmĩ rowahdu ABESS/96 wam hã. Tahã mãt psê snã wasku nhanẽ ĩsnãkrta hawi akwẽ kmã r owaskuze kãtô dure akwẽ krnmrõ mnõze kãtô dure akwẽ sikapko mnõze, Dat Krdawaihkâ Mnõ Pibumã Hã Danmĩ Rowahtu kmã sizus pesê mnõ pibumã.Tô Brasil kmã rowaskuze ĩsnãkrta hawi ĩt krsanãmr mnõ re wat dure akwẽ kmã rowaskuze ĩt krsanãmr. Akwẽ tô ĩsnãkrta hawi Brasil wam hã akwẽ nmẽ. Tanẽ nmẽ, tô ĩkwaĩmba Dat Krdawaihkâ Mnõ Pibumã Hã Danmĩ Rowahdu, akwẽ nĩm romkmãdkâ hawi danĩm romkmãdâ tkrê dam rowahtu mnõ.Tâkãnẽ mnõzem hawi, watô danĩm romkmãdâ kâr pês. Tô akwẽ nĩm romkmãdkâ kupanã, Dat Krdawaihkâ Mnõ Pibumã Hã Danm Rrowahdu, Serviço Social nã dat krwamtrẽ mnõ danĩm romkmãdâ tkrê dam wasku mnõ nã, are dure tkrê dam rowahtu mnõ re, hêsuka zanãmrkwa tkrê dam rowahtu mnõ re, akwẽ nã kãtô dure akwẽ nĩm romkmãdkã nã, tkrê wamtrẽ mnõ kõdi. Are Antropologia nã dat krẽwamtrẽ mnõ si kãtô dure Estágio Supervisionado de Campo nã dat krẽwamtrẽ mnõ si, za aimõ akwẽ nã kãtô dure akwẽ nĩm romkmãdkã nã tkrê wamtrẽ pês.
|
